இந்த ஆண்டுக்கான பிலிம்பேர் விருது பட்டியலில் இடம் பெற்றுள்ள சிறந்த கலைஞர்கள்

ஒவ்வொரு ஆண்டும் இந்திய திரைத்துறையில் சிறந்து விளங்கும் கலைஞர்களுக்கு பிலிம்பேர் விருதுகள் வழங்கப்பட்டு வருகிறது. அந்த வகையில் தென் இந்தியாவிலும் தமிழ், தெலுங்கு, ஹிந்தி, கன்னடம் மற்றும் மலையாளம் போன்ற மொழி கலைஞர்களுக்கு பிலிம்பேர் விருதுகள் கடந்த 65 வருடங்களாக வழங்கப்பட்டு வருகிறது. கடந்த ஆண்டு 64வது பிலிம்பேர் விருது ஐதராபாத்தில் நடந்து முடிந்தது.

இதனை தொடர்ந்து 65வது பிலிம்பேர் விருதுகள் விரைவில் வழங்கப்பட உள்ளநிலையில் அதற்கான பட்டியலை வெளியிட்டுள்ளது. இந்த பட்டியலில் தமிழ் சினிமாவின் முன்னணி கலைஞர்கள் இடம்பெற்றுள்ளனர். இதில் சிறந்த நடிகருக்கான பட்டியலில் விஜய் (மெர்சல்), மாதவன் (விக்ரம் வேதா), விஜய் சேதுபதி (விக்ரம் வேதா), கார்த்தி (தீரன் அதிகாரம் ஒன்று), ராஜ்கிரண் (பவர் பாண்டி) ஆகியோர் இடம்பிடித்துள்ளனர்.

சிறந்த நடிகைக்கான விருது பட்டியலில் நயன்தாரா (அறம்), ஜோதிகா (மகளிர் மட்டும்), அதிதி பாலன் (அருவி), ஆண்ட்ரியா (தரமணி) மற்றும் அமலாபால் (திருட்டு பயலே 2) ஆகியோர் இடம்பிடித்துள்ளனர். மேலும் சிறந்த இயக்குனருக்கான விருது பட்டியலில் அட்லீ (மெர்சல்), கோபி நயினார் (அறம்), ஹச் வினோத் (தீரன் அதிகாரம் ஒன்று), புஷ்கர் காயத்ரி (விக்ரம் வேதா) ஆகியோரும் இடம் பிடித்துள்ளனர். இதில் ரசிகர்கள் தங்களுடைய விருப்பமான கலைஞர்களுக்கு ஆதரவு தெரிவித்து வரும் நிலையில் சிறந்த நடிகராக விஜயும், சிறந்த நடிகையாக நயன்தாராவும், சிறந்த இயக்குனராக அட்லீயும் தேர்வாக அதிகஅளவு வாய்ப்புள்ளதாக தெரிகிறது.