சுசீந்திரனின் சாம்பியன் படத்தில் டப்மாஸ் மிர்னாலினி

இயக்குனர் சுசீந்திரன், தனது முதல் படமான வெண்ணிலா கபடி குழு படத்தின் வெற்றிக்கு பிறகு நான் மகான் அல்ல, பாண்டிய நாடு, ஜீவா போன்ற பல வெற்றி படங்களை இயக்கியுள்ளார். இயக்குனராக இருந்த இவர் தற்போது நடிகராகவும் 'சுட்டுப்பிடிக்க உத்தரவு' படத்தின் மூலம் அறிமுகமாக உள்ளார். இவருடைய இயக்கத்தில் நெஞ்சில் துணிவிருந்தால் படத்திற்கு பிறகு ஏஞ்சலினா, ஜீனியஸ், சாம்பியன் போன்ற படங்கள் உருவாகி வருகிறது.

இதில் புதுமுகங்களை கொண்டு சாம்பியன் படம் உருவாகி வருகிறது. இந்த படம் கபடி, கிரிக்கெட் போன்றவற்றிற்கு பிறகு கால்பந்தை மையமாக கொண்டு உருவாகி வருகிறது. புதுமுகமான் ரோஷன் நாயகனாக நடித்து வரும் இந்த படத்தின் படப்பிடிப்பு சமீபத்தில் தொடங்கி தற்போது விறுவிறுப்பாக நடைபெற்று வருகிறது. இந்த படத்தின் நாயகியாக டப்மாஸ் பிரபலமான மிர்னாலினி ஒப்பந்தம் செய்யப்பட்டுள்ளார். இந்த படம் இவர் நாயகியாக தமிழ் சினிமாவிற்கு அறிமுகமாகும் முதல் படம்.

இது தவிர டப்மாசில் பிரபலமானதற்கு பிறகு படப்பிடிப்பை தவிர்த்து வந்த மிர்னாலினி, சமீபத்தில் விஜய் சேதுபதி லேடி கெட்டப்பில் நடித்து வரும் 'சூப்பர் டீலக்ஸ்' படத்தில் சிறு கதாபாத்திரத்தை ஏற்று நடித்து வருகிறார். இந்த படத்திற்கு பிறகு மிர்னாலினி நாயகியாக சாம்பியன் படத்தில் இணைந்துள்ளார். இந்த படத்திற்கு அரோல் கரோலி இசையமைத்து வருகிறார். பிரபல கால்பந்து வீரர் விஜயன் பயிற்சியாளராக பணிபுரிந்து வரும் இந்த படம் இந்த ஆண்டு இறுதியில் டிசம்பரில் வெளியாக உள்ளது.