நாச்சியார் படத்தின் புதிய ரிலீஸ் தேதி அறிவிப்பு

வித்தியாசமான கதைக்களத்தை சினிமா துறை மற்றும் ரசிகர்களுக்கு கொண்டு சேர்ப்பவர் இயக்குனர் பாலா. இவர் 1999-ஆம் ஆண்டு நடிகர் விக்ரம் நடிப்பில் வெளியான 'சேது' படத்தின் மூலம் இயக்குனராக அறிமுகமானவர். இதனை தொடர்ந்து இவர் நந்தா, பிதாமகன், நான் கடவுள், அவன் இவன், தாரை தப்பட்டை உள்ளிட்ட படங்களை இயக்கியுள்ளார். இவர் இயக்கத்தில் வெளிவந்த அனைத்து படங்களும் கதாநாயகர்களுக்கு பெயர் சொல்லும் படமாகவே அமைந்து ரசிகர்களுக்கு புதுவிதமான அனுபவத்தை கொடுக்கும்.

இதில் இவருடைய இயக்கத்தில் வெளிவந்த சேது, பிதாமகன், நான் கடவுள், பரதேசி போன்ற படங்கள் திரைத்துறையின் சிறந்த இயக்குனர் விருதை இவருக்கு அளித்தது. இதனை தொடர்ந்து இவருடைய இயக்கத்தில் தற்போது உருவாகியுள்ள படம் 'நாச்சியார்'. இந்த படத்தில் நடிகை ஜோதிகா மற்றும் நடிகர் ஜிவி பிரகாஷ் முக்கிய கதாபத்திரத்தில் இணைந்துள்ளனர். இந்த படத்தில் ஜோதிகா காவல் துறை அதிகாரியாக முதல் முறையாக களம் இயங்கியுள்ளார். முன்னதாக வெளிவந்த டீசர் மற்றும் ட்ரைலரை பார்க்கும் போது ஜோதிகாவின் வேலை எதிரிகளால் பறிபோக பழிவாங்கும் அவதாரம் எடுக்கிறார்.

நடிகர் ஜிவி பிரகாஷ் ஒரு பெண்ணை காதலிக்கிறார். அவர் கொல்லப்பட, ஜிவி பிரகாஷ், ஜோதிகாவுடன் இணைந்து பழிவாங்க உதவி செய்வதாக தெரிகிறது. இயக்குனர் பாலாவின் இயக்கத்தில் வெளிவந்த படங்களுக்கு பெரும்பாலும் இசைஞானி இளையராஜா இசையமைப்பது வழக்கம். தற்போது இந்த படத்திற்கும் இசைஞானி இளையராஜா இசையமைத்துள்ளார். இந்த படத்தை பி ஸ்டுடியோஸ் மற்றும் இஓன் ஸ்டுடியோஸ் நிறுவனம் சார்பில் இயக்குனர் பாலா தயாரிக்கிறார். இந்த படம் அடுத்த மாதம் பிப்ரவரி 9ஆம் தேதி வெளியிடுவதாக படக்குழு முன்னதாக தெரிவித்தது. ஆனால் எதிர்பாராத காரணங்களால் இந்த படத்தை பிப்ரவரி 16-ஆம் தேதி வெளியிடுவதாக படக்குழு தற்போது தெரிவித்துள்ளது.